荔园在线
荔园之美，在春之萌芽，在夏之绽放，在秋之收获，在冬之沉淀
[回到开始]
[上一篇][下一篇]
发信人: yunyun (老鼠..中锋人物), 信区: CA
标 题: 作为文学院男子篮球队队长一年
发信站: 荔园晨风BBS站 (2004年11月03日21:38:29 星期三), 站内信件
又一年了，好快，时间过咗一年，我都做咗呢个文学院嘅队长一年了。而家，
我呢个就嚟收皮嘅队长讲返D嘢。
首先唔好意思啊，我用广东话，希望kensou师兄唔好怪我...广东话点都係我
母语..我觉得好表达啲。
以前嘅嘢我就唔想再讲了，因为我旧年都讲过了，今年，作为一支唔係四强，
唔係种子队唔係当年有谢青佢哋嘅队伍。我哋暑假开始训练，虽然人数唔係咁齐，
但係都保证到一定嘅人数，特别係大二嘅师弟，积极性好高。我哋希望可以去用我
哋自己嘅努力去提高自己。因为我哋知道我哋而家冇一班巨人。我哋谂住要提早去
训练、去准备，之后我地开学组织每个星期六训练。我可以讲，在队嘅每一个队员
都非常之努力，我地有新嘅战术，新嘅队员，新嘅面目。
热身赛，我哋俾其他院见到我哋嘅风貌，唔係走咗主要人物就散晒嘅队伍。但
係唔可以唔讲嘅係。我哋嘅结构老化，大四嘅队员多，都曾经出现过唔少嘅问题。
有球员不满球队，有球员想离队，但係最终都可以留下来，战到今日。
旧年最后一场比赛之后，我喊咗；而今年，我冇。因为我知道，我哋已经好努
力，而且好团结。虽然结果可能係唔係咁令人满意，但係我都觉得值得，因为我觉
得我努力过，大家努力过，结果唔係咁重要，可能人成熟咗都係一个原因了。
旧年我问谢青，你走咗之后我哋点打，佢话，唔紧要你哋有师兄嘎嘛。转眼佢
讲嘅师兄就又要走了。
曹敏钦，个个都叫你郭富城，唉鬼叫你生得似。其实我知道你好辛苦，你係一
个事业心重嘅人，其实我哋都知道你好唔想再打今年。冬槿都同我讲咗好多次，唔
好理你喇，佢无用嘎。但係我都係想你返嚟，因为作为队长都唔想自己任何一个队
员失散。可能你最后都係明我嘅苦心。返来，虽然你状态係唔係咁好。但係都帮助
咗自己球队。你要走喇。希望你以后事业有成喇。
拉登，作为教练员，我可以讲你绝对係尽心尽职。暑假返嚟练波，研究战术，
带师弟，你可以话係全包，同以前成日唔来训练嘅你真係好唔同。我知道你好尽力，
可能係你最尽力嘅一年，训练完永远都係你同冬槿一齐留低研究。可以讲你今年係
冇嘢可讲嘅，其实，我知你好想赢好想打好。特别係今日打完比赛后见到你嘅眼神。
拉登得闲要返嚟操下我哋啊。
冬槿，一个一直渴望打好波..可以得到人教嘅人，今年你就变咗教人，不过你
教人其实都好掂。起码教识我好多嘢，你最俾我深印象嘅係，你成日要食面，话食
面先会肥。唉，你从后卫打到落大前锋。你都算得拉，而且，次次最动情都係你，
记得几次训练完，输波，你都係眼湿湿咁讲心里话。其实大家最对唔住嘅老队员就
係你喇。
波仔，最少嘢讲就係你。其实你心里面好多嘢想讲。而且，曾经一度差点退队，
但係最后都係留落来，好嘢!你嘅三分可能係冇咁快喇...但係你嘅斗志我觉得都係
响度。记得你发过一条信息同我讲，文学院係曾经跻身四强嘅队伍，唔可以放弃。我
当时就下决心要打好。多谢你呢条信息。
大春，最似明星係你了，家辉哥。跑快攻你最掂，又有一把磁性嘅声音。不过今
年好似冇乜点叫，其实你都好辛苦..又要返工，平时又要灌水，仲要沟女。不过你都
係尽心尽力一齐训练。今日我见到你好唔爽，因为你係响隔离同我讲D裁判唔掂，不过
算喇，以后要搞好 D业务喇。
大三大二我就唔讲甘多了，留返下年讲。
傻驴，成日唔出声，唉，真係俾你激死，俾人犯规係咁，犯人哋规又係咁。以后
要叫多D先得啊。
乳春，你啊，定D喇要，平时多D去揾拉登，吸晒佢哋D精华，以后文学院后卫靠你喇。
赵肥，又要搞女队，又要搞男队，你最威..嗱嗱声吸晒冬槿嘅女篮精华。女篮以
后睇你喇。
BOBO..旧年你就顶咗谢青着住14号打管院，今年我特登帮你拣咗14号，而后要担
起责任。
小生，最冲得就係你，不过以后要多D谂下点打，唔好净係冲，要醒嘎喇。
康仔，5号位..你都打得几好..不过基本功都係要提高，特别係控球。
付佬，中间以后係你嘎喇，要硬D啊，唔好咁软啊，而且处理球都要提高。
点讲都好，篮球队最终都係要多谢支持我哋嘅观众，今日到最后，我都仍然听到
大家係度叫文学院加油，呢一刻，我就觉得，我哋係值得嘅，今日可能真係对唔住观
众。但係大家都睇到我哋係点样一支队，每个队员係点样一个人。我地係无悔着住文
学院红色战衣，最后都系要希望大家要继续支持文学院篮球队，真係多谢大家.!!!
--
※ 修改:·kensou 於 11月03日22:14:57 修改本文·[FROM: 192.168.29.68]
※ 来源:·荔园晨风BBS站 bbs.szu.edu.cn·[FROM: 210.21.224.234]
[回到开始]
[上一篇][下一篇]
荔园在线首页 友情链接：深圳大学 深大招生 荔园晨风BBS S-Term软件 网络书店